Претседателот  на Судскиот совет  оствари работна средба со директорот на Агенцијата за управување со одземен имот

Претседателот на Судскиот совет на Република  Северна Македонија, Сашко Георгиев денес оствари работна  средба со директорот  на Агенцијата  за управување со одземен имот, Дритон Небиу. До средбата дојде по иницијатива на Судскиот совет и само еден ден  по одржувањето на седницата  на Советот, на која  беше алармирано  дека неколку помали судови во државата се соочуваат со многу сериозен  проблем  од недостиг на возила за службени потреби.

Во разговорот, кој помина во конструктивна атмосфера, претседателот Георгиев посочи дека  има судови, кои немаат ниту едно возило  и  не можат нормално да функционираат во нивната редовна  работа. Станува збор за  неколку помали судови од внатрешноста, за кои беше побарано од директорот да се направи напор да се отстапат  на користење на судовите запленети  конфискувани возила  од сторители на кривични дела.

Директорот Небиу изрази подготвеност и разбирање  да излезе во пресрет на ваквите барања и да се спроведе  потребната законска процедура, со цел  да се добијат возила  за кои што постои правосилна пресуда  во што е можно покус рок. Воедно, во разговорот беа отворени  и други прашања, а најмногу внимание беше посветено на  долгото  траење на судските постапки, од кои  некои траат  и по повеќе години, со што се  обезвреднува одземениот имот и се губи смислата на  изречената мерка.