МЕМОРАНДУМОТ- НОВ ПОЧЕТОК ВО СОРАБОТКАТА НА СУДСКИОТ СОВЕТ И СОВЕТОТ НА ЈАВНИ ОБВИНИТЕЛИ

Претседателот на Судскиот совет на Република Северна Македонија, Сашко Георгиев и претседателот  на Советот на јавни обвинители, Антонио Јолевски  на 25.09 2023 година потпишаа Меморандум за соработка на двете тела. На чинот на потпишување присуствуваа и двајцата  нивни заменици, судијата Ханиф Зендели и Арбер Исаку, како и полскиот судија, Грег Борковски, лидер на Компонентата 1, Поддршка на ЕУ за „Владеење на правото“.

Во изјава за новинарите, двајцата претседатели  нагласија дека  потпишувањето на Меморандум е финализирање на една дамнешна идеја,која ќе значи нов почеток  во соработката на двете тела.

Целта на Меморандумот е воспоставување на  соработка помеѓу  Судскиот совет и Советот на јавни обвинители, за меѓусебна тесна координација, планирање и реализирање  на заеднички активности.  

            Соработката, особено  ќе се однесува на: проекции  за соодносот  на кандидати  за идни судии и јавни обвинители при уписот на нови слушатели во Академијата за обука на судии и јавни обвинители,  заеднички настап пред  државни институции за обезбедување на подобри материјално-финансиски услови за работење, како и поголема самостојност во буџетирањето, унапредување на статусот на стручната служба, како и за други  прашања од интерес на двата совета.