Во таа насока, Претседателката на Врховниот суд на Република Северна Македонија го презентираше Извештајот од посетите на пониските судови, во кој се нотираат состојбите и проблемите и се даваат заклучни констатации и препораки.

Претседателката Адеми истакна дека општа констатација од извршените посети на апелационите и основните судови е дека судовите во Република Северна Македонија се соочуваат со бројни проблеми кои предизвикуваат сериозни реперкусии во работењето и дека потребно е преземање на итни мерки за надминување на нотираната состојба која е алармантна.

Во периодот од 26.04.2024 до 12.09.2024 година, претседателката на Врховниот суд на Република Северна Македонија, Беса Адеми, врз основа на законските надлежности и овластувањата утврдени во Судскиот деловник изврши посета на основните судови, на апелационите судови, на Управниот суд и на Вишиот управен суд.

Со посетите на судовите во Република Северна Македонија од страна на претседателот на Врховниот суд на Република Северна Македонија се овозможи непосреден увид на состојбите во судовите и информирање за проблемите со кои се соочуваат судовите и кои предизвикуваат реперкусии во нивното функционирање.

Воедно, посетите имаа за цел да се унапреди соработката помеѓу судовите во Република Северна Македонија, заснована на законските и меѓународни принципи за независност на судството од законски, функционален и финансиски аспект.

Извештаите од посетите ќе бидат објавени на веб страницата на судот.